კენკროვანი ხილი. კენკროვანი მცენარეული ბოჭკოების მდიდარ წყაროს წარმოადგენს და სხვა ხილთან შედარებით ნაკლებ შაქარს შეიცავს. კენკროვანი ხილი აჩქარებს მეტაბოლიზმს და არეგულირებს სისხლში შაქრის შემცველობას. მეცნიერთა მტკიცებით, მარწყვში შემავალი ანტიოქსიდანტები ხელს უშლის სახამებლის შაქრად გარდამქნის პროცესს, რის შედეგად სისხლში ნაკლები შაქარი ხვდება. ჟოლო შეიცავს კეტონს, რომელსაც მწარე წიწაკაში შემავალი კაპსაიცინის მსგავსი ეფექტი აქვს – ახდენს სხეულში სიმხურვალის გენერირებას და ხელს უწყობს ცხიმის წვის პროცესს. მოცვის რეგულარულად მიღება კი ქოლესტერინის დონეს ამცირებს.

კვერცხი. კვერცხი ერთ-ერთი გამორჩეული დიეტური პროდუქტია. ის მდიდარია პროტეინებით და მსუყე საკვებია, ამავდროულად, მიღებიდან რამდენიმე საათის მანძილზე, 20-35%-ით აჩქარებს მეტაბოლიზმს. სხვადასხვა ცდებითა და დაკვირვებებით ვლინდება, რომ ადამიანები, რომლებიც საუზმეზე კვერცხს მიირთმევენ, ამ პროდუქტის ნოყიერებიდან გამომდინარე, დღის განმავლობაში დაახლოებით 400 კალორიით ნაკლებს იღებენ. თუ კვირაში რამდენჯერმე 2-3 კვერცხს შეჭამთ, ეს ცხიმის დაწვაშიც დაგეხმარებათ და დანაყრებულიც იქნებით. უმჯობესია მოხარშული კვერცხი მიირთვათ და არა შემწვარი.

მწვანე ჩაი. ეხმარება ფარისებრ ჯირკვალს ჰორმონ თიროქსინის წარმოქმნაში, რომელიც უმნიშვნელოვანეს როლს თამაშობს მეტაბოლიზმის დარეგულირებაში. ამასთან, მწვანე ჩაი შეიცავს ძლიერ ანტიოქსიდანტს, ეპიგალოკატექინის გალატს (ე.წ. ECGC), რომელიც ხელს უწყობს მეტაბოლიზმის დაჩქარებასა და ცხიმის წვის პროცესს. ის ეფექტურად ებრძვის მუცლის ცხიმს. თუმცა, გასათვალისწინებელია, რომ დიდი რაოდენობით მწვანე ჩაის მიღება არ არის რეკომენდებული. მკვლევართა რეკომენდაციით, დღიურად 800 მგ-ზე მეტი ანტიოქსიდანტი არ უნდა მიიღოთ, რადგან ამან შეიძლება ღვიძლის პრობლემები გამოიწვიოს.

კეფირი. ნაწლავის ბაქტერიები გავლენას ახდენენ თქვენს წონასა და მეტაბოლიზმზე. კეფირი კი შეიცავს პრობიოტიკს, რომელიც ხელს უწყობს ორგანიზმში ე.წ. „მეგობრული“, ცოცხალი ბაქტერიების გამრავლებას და ნაწლავის ფლორის მოწესრიგებას. ეს კი ეხმარება ნაწლავს ნორმალურ ფუნქციონირებაში.

ზეითუნის ზეთი. ზეითუნის ზეთი მდიდარია ომეგა-3-ით. იგი აუმჯობესებს ბრმანაწლავის, ტვინის და სხვა ორგანოების ფუნქციონირებას და მადასაც არეგულირებს. გარდა ამისა, არეგულირებს სისხლში შაქრის დონეს და ხელს უწყობს წონის კლებას.

ბევრი მწარმოებელი ისეთ ჯადოსნურ წამლებს, საკვებ დანამატებსა თუ წვენებს გვთავაზობს, რომელიც თქვენს მეტაბოლიზმს დააჩქარებს. თუმცა, არცერთი მათგანი არ არის სრულად უსაფრთხო. ამიტომ, უმჯობესია თქვენი ყოველდღიური რაციონი ნატურალური საკვებით გაამდიდროთ, რაც გვერდითი მოვლენების გარეშე დაგეხმარებათ იყოთ ფორმაში.