ალბათ, ერთ-ერთ ყველაზე გავრცელებულ ფრაზას  – „დეპრესიაში ვარ“, ნებისმიერი ასაკის და სტატუსის მქონე ადამიანისგან მოისმენთ. რა თქმა უნდა, ზოგიერთს  მართლა აქვს დეპრესიული აშლილობა და შესაბამისი სამედიცინო დახმარება სჭირდება. თუმცა, უმეტეს შემთხვევაში, როდესაც ვამბობთ – „დეპრესია მაქვს“, ვგულისხმობთ, რომ უხასიათოდ ვართ და შფოთვები გვაწუხებს. ეს მდგომარეობა კი, უმეტესად, ჩვენი მავნე ჩვევების ლოგიკური შედეგია. ქვემოთ შეგიძლიათ გაეცნოთ ყველაზე გავრცელებულ, ერთი შეხედვით – „უწყინარ“ ჩვევებს, რომლებსაც, საბოლოო ჯამში, იმ მდგომარეობამდე მივყავართ, როცა ცხოვრებაც კი „გვეზარება“.

არაჯანსაღი კვება. სისტემატურად არაჯანსაღი საკვების მიღება აუცილებლად აისახება ადამიანის როგორც ფიზიკურ, ისე მენტალურ მდგომარეობაზე. შეუძლებელია მუდმივად არაჯანსაღად იკვებებოდეთ და თავს ენერგიულად გრძნობდეთ. არასწორ კვებას სიმძიმის შეგრძნება, უენერგიობა, ფიზიკური სისუსტე მოსდევს… ეს ყველაფერი, რა თქმა უნდა, თქვენს ხასიათზეც აისახება. უფრო რთულ შემთხვევებში კი თავს იჩენს ისეთი სერიოზული დაავადებები, როგორიცაა დიაბეტი, ოსტეოპოროზი, გულ-სისხლძარღვთა სხვადასხვა დაავადება, ჰიპერტონია, სიმსუქნე და ა.შ.

წუწუნი და საკუთარი თავის შეცოდება. ხომ შეგიმჩნევიათ, როდესაც ცხოვრებაში რაღაც ისე არ მიდის, როგორც გვსურს, მაშინ სხვას ვადანაშაულებთ. ხოლო როცა ყველაფერი კარგად მიდის, – ეს, რა თქმა უნდა, ჩვენი დამსახურებაა! წუწუნი მარტივია, მაგრამ რთული სიტუაციიდან გამოსვლა საკუთარი თავის შეცოდებით ვერ მოხდება. ეს შესაძლებელია მხოლოდ იმის გაცნობიერებით, რომ ყველაფერზე, რაც ჩვენ ცხოვრებაში ხდება, პასუხისმგებლობა საკუთარ თავზე უნდა ავიღოთ. მართალია, ბევრი რამ ჩვენზე არ არის დამოკიდებული, მაგრამ ის, თუ როგორი რეაქცია გვექნება და როგორ მოვიქცევით ამა თუ იმ სიტუაციაში, მთლიანად ჩვენზეა დამოკიდებული.

წარსულის დაუსრულებელი ანალიზი. ადამიანებს ფიქრებით მუდმივად წარსულში ყოფნა და იმის ანალიზი გვახასიათებს, თუ რა მოხდებობა სხვაგვარად რომ მოვქცეულიყავით. მნიშვნელოვანია გავაცობიეროთ, რომ ის, რა მოცემულობაც ამ მომენტში გვაქვს,  სხვანაირი ვეღარ გახდება იმიტომ, რომ ეს უკვე მოხდა. ასე რომ, აზრს მოკლებულია წარსულზე ფიქრი და არშემდგარზე დარდი.