ქრონიკული გამოუძინებლობა ბევრს აწუხებს. უძილობას ჯანმრთელობის სერიოზული პრობლემების გამოწვევა შეუძლია, მათ შორის დიაბეტის, ჭარბწონიანობის, გულის პრობლემების, მაღალი წნევის, დეპრესიის და ა.შ.

მიმოვიხილოთ 7 ყველაზე გავრცელებული მიზეზი, რასაც თქვენი ძილის რიტმის დარღვევა შეუძლია. იქნებ რომელიმე მათგანი ან, რამდენიმე ერთად, თქვენი ყოველდღიურობის ნაწილია? ეცადეთ ეტაპობრივად შეცვალოთ ძილის ხელისშემშლელი ჩვევები.

ძილის წინ ჭამა. ალბათ გამოგიცდიათ – ძილის წინ დიდი ულუფის მირთმევა ართულებს ჩაძინების პროცესს. სასურველია კვება დაძინებამდე მინიმუმ 2-3 საათით ადრე დაასრულოთ. თუ ისე მოხდა, რომ ძილის წინ ჭამეთ და თავს დამძიმებულად გრძნობთ, გაისეირნეთ – ეს საკვების მონელებაში დაგეხმარებათ.

დიდი რაოდენობით კოფეინის მიღება. თუ დღის განმავლობაში დიდი რაოდენობით კოფეინს მიიღებთ, შესაძლოა დაძინება გაგიჭირდეთ, ან ღამის განმავლობაში ხშირად გაგეღვიძოთ. თუ სისტემატურად ასეთ რეჟიმში იცხოვრებთ, დიდი შანსია ინსომნიითაც (ძილთან დაკავშირებულ სირთულეებით) დაავადდეთ. კოფეინი სხეულში დაახლოებით 6-8 საათის განმავლობაში რჩება. შესაბამისად, რეკომენდებულია დღის 2 საათის შემდეგ კოფეინი საერთოდ აღარ მიიღოთ.

ინტენსიური ვარჯიში ძილის წინ. ძილის წინ არ არის რეკომენდებული ძალისმიერი ვარჯიშები, სირბილი და ა.შ. თქვენს სხეულს გარკვეული დრო სჭირდება იმისთვის, რომ  ვარჯიშის შემდეგ გულის ცემა, სხეულის ტემპერატურა და ადრენალინის დონე ნორმაში ჩადგეს. შესაბამისად, უმჯობესია დაძინებამდე სულ მცირე 2-3 საათით ადრე ივარჯიშოთ. რაც შეეხება ისეთ აქტივობებს, როგორიცაა სეირნობა ან მსუბუქი გაწელვა, ეს შეიძლება, პირიქით, დაგეხმაროთ კიდეც გემრიელად ჩაძინებაში.

ეკრანის გამოსხივება. ძილის წინ მესიჯობა, სიახლეების კითხვა, ფეისბუქისა და ინსტაგრამის “სქროლვა” და ა.შ. ალბათ ერთ-ერთი ყველა გავრცელებული და, ერთი შეხედვით, უწყინარი ჩვევაა. მაგრამ სმარტფონის, ლეპტოპის, პლანშეტისა და სხვა ელექტრონული მოწყობილობის ეკრანის გამოსხივება ძალიან ცუდად მოქმედებს ძილის ხარისხზე. საქმე ისაა, რომ ამ მოწყობილობების კაშკაშა გამოსხივების გამო სხეულს ჰგონია, რომ ჯერ კიდევ დღეა, რაც არღვევს ბიოლოგიურ რიტმს და სხეულს მშვიდად დაძინების საშუალებას არ აძლევს. რეკომენდებულია დაძინებამდე მოერიდოთ მობილურის, ლეპტოპის და სხვა მოწყობილობის გამოყენებას. თუ ასეთი აუცილებლობა არსებობს, დააყენეთ ეკრანის გამოსხივება უფრო მუქ რეჟიმზე.

სტრესი. უძილობის ერთ-ერთი ყველაზე გავრცელებული მიზეზი სტრესია. სტრესის გამომწვევი უამრავი მიზეზი არსებობს – დაძაბული სამუშაო გრაფიკი, ცხოვრების მეტისმეტად სწრაფი ტემპი, ინფორმაციის უწყვეტი ნაკადის მიღება და სხვა მრავალი. ამ ყველაფრით აფორიაქებული და, ამავდროულად, გამოფიტული სხეული ისეთ მდგომაროებაში ვარდება, რომ მშვიდად დაძინება, ფაქტობრივად, შეუძლებელი ხდება. ამიტომაა რეკომენდებული ყოველდღიურად ისეთი აქტივობებითაც დაკავდეთ, რაც სულიერი სიმშვიდის მოპოვებასა და ენდორფინების გამოყოფაში დაგეხმარებათ. ესაა მედიტაცია, სეირნობა და ნებისმიერი თქვენთვის სასიამოვნო და სასარგებლო საქმიანობა.

გვიან დაძინება. ზოგჯერ უძილობა დიდი ხნის გამომუშავებული ჩვევების შედეგია. ასეთი ჩვევა შეიძლება გვიან დაძინება იყოს. იმისთვის, რომ ძილის პრობლემები მოაგვაროთ, მნიშვნელოვანია დაიცვათ გარკვეული წესები: არ დაიძინოთ გვიან, ეცადეთ ყოველთვის ერთი და იმავე დროს დაიძინოთ და გაიღვიძოთ; თუ დაძინება მაინც გიჭირთ, მაშინ ძილის წინ, დაახლოებით 15 წუთის განმავლობაში, წიგნის წაკითხვა სცადეთ.

ალკოჰოლი. შეიძლება მოგეჩვენოთ, რომ ძილის წინ ალკოჰოლის მიღება არათუ ხელს გიშლით, არამედ გეხმარებათ კიდეც დაძინებაში. მაგრამ, საერთო ჯამში, ეს უარყოფითად აისახება ძილის ხარისზე. საქმე ისაა, რომ ძილის წინ ალკოჰოლის მიღება არღვევს სწრაფი ძილის ფაზას, რომელშიც ღამის 25%-ს ვატარებთ და რომელიც უმნიშვნელოვანესია ორგანიზმის აღდგენითი პროცესებისთვის. სწორედ ამიტომაა რეკომენდებული ალკოჰოლის მიღება დაძინებამდე 2-3 საათით ადრე შეწყვიტოთ.

მშვიდ ძილზე სერიოზულად უნდა იზრუნოთ, რადგან ძილი მნიშვნელოვანია ენერგიისა და სასიცოცხლო პროცესების აღდგენისა და უზრუნველყოფისთვის. თუ ზემოთ ჩამოთვლილ რჩევებს ითვალისწინებთ და ძილთან დაკავშირებული პრობლემები მაინც გაწუხებთ, გირჩევთ დახმარებისთვის პროფესიონალს მიმართოთ.