ყველას გვსმენია ფეხით სიარული რომ ძალიან სასარგებლოა ჯანმრთელობისთვის.
თუმცა, ხშირ შემთხვევაში, ფეხით სიარულს ანგარიშგასაწევ ფიზიკურ აქტიურობად არ აღიქვამენ, რადგან ფეხით სიარულის ინტენსიობა შედარებით დაბალია ვიდრე, მაგალითად, სირბილის ან სხვა მაღალინტენსიური ფიზიკური ვარჯიშის. თუმცა, ინტენსიობის დაბალანსება შესაძლებელია ფეხით სიარულის სიხშირისა და ხანგრძლივობის გაზრდით.
აშშ-ის გულის ასოციციის რჩევით, სასურველია 20 წუთიანი მაღალინტენსიური ვარჯიში კვირაში სამჯერ, ან ფეხით სეირნობა 30 წუთის განმავლობაში კვირაში ხუთჯერ.
მაინც რა განსაკუთრებული სიკეთეების მოტანა შეუძლია ფეხით სიარულს? გთავაზობთ არასრულ, თუმცა შთამბეჭდავ ჩამონათვალს:
გულის ჯანმრთელობა. ფეხით სიარულსა და გულის ჯანმრთელობას შორის კავშირის დასადგენად არაერთი კვლევაა ჩატარებული. მათ თანახმად, რეგულარული სეირნობა დაახლოებით 31%-ით ამცირებს გულ-სისხლძარღვთა მოულოდნელი პრობლემებისა და შეტევების რისკს, რაც საგრძნობლად ამცირებს მოულოდნელი გარდაცვალების საფრთხეს.
სისხლში შაქრის შემცველობის შემცირება. აშშ-ის დიაბეტის ასოციაციის კვლევის თანახმად, ყოველი კვების შემდეგ 15 წუთის განმავლობაში სეირნობას სისხლში შაქრის შემცველობის შემცირება შეუძლია. ამ მიზნის მისაღწევად დღეში სამჯერ, საუზმის, ლანჩისა და სადილის შემდეგ 15-15 წუთი სეირნობა უფრო ეფექტიანია, ვიდრე დღის ნებისმიერ სხვა მონაკვეთში 45 წუთის განმავლობაში სეირნობა. სისხლში შაქრის შემცველობის შემცირებასთან ერთად მცირდება დიაბეტის რისკიც. გარდა ამისა, ასოციაციის ინფორმაციით, რეგულარული სეირნობა ინსულტის რისკს 20-40%-ით ამცირებს.
ხრტილების ჯანმრთელობა. სეირნობა ხელს უწყობს ხრტილებისთვის სისხლის ნაკადის მიწოდებას, რაც მათ სათანადო კვებას უზრუნველყოფს და იცავს ძვლების დაბოლოებებს დაზიანებისგან. ფეხით სიარულს შეუძლია შეამციროს ართრიტით გამოწვეული ტკივილი, დაჭიმულობა და შეშუპება.
ვარიკოზული ვენების პროფილაქტიკა. ფეხით სიარული განსაკუთრებით სასარგებლოა მათთვის, ვისაც ვარიკოზული ვენები აწუხეს. სიარული დაბალი ინტენსიობის ფიზიკური აქტიურობაა, რომელიც აძლიერებს წვივის კუნთებს ზედმეტად გადატვირთვის გარეშე. გარდა ამისა, ხელს უწყობს სისხლის ნორმალურ ცირკულაციას და გულისთვის მიწოდებას, რაც ამ პრობლემის პროფილაქტიკისთვის ძალიან მნიშვნელოვანია.
განწყობის გაუმჯობესება. სეირნობა ამცირებს სტრესის და დაძაბულობის დონეს ორგანიზმში და მნიშვნელოვნად აუმჯობესებს განწყობას. ნებისმიერი ტიპის ვარჯიში, მათ შორის – ფეხით სიარული, ორგანიზმში ენდორფინების გამოყოფას უწყობს ხელს, რაც განწყობის ამაღლების ერთგვარ ბუნებრივ საშუალებას წარმოადგენს. ალბათ შეგიმჩნევიათ, როგორი სიამოვნებაა ფეხით გავლა, მითუმეტეს თუ მზიან ამინდსა და გამწვანებულ გარემოში გაისეირნებთ.
ძილის გაუმჯობესება. ფეხით სიარული ააქტიურებს ჰორმონ მელატონინის გამოყოფას, რომელიც ძილისა და გაღვიძების ციკლის დაბალანსებაზეა პასუხისმგებელი. ამიტომაა სეირნობა პირდაპირ კავშირში ძილის ხარისხთან. გარდა ამისა, სეირნობა სტრესის მოხსნაშიც დაგეხმარებათ, რაც, თავის მხრივ, მშვიდ ძილს შეუწყობს ხელს.
წონის კონტროლი. რეგულარული სიარული დაგეხმარებათ მუდმივად იყოთ ფორმაში. ის, თუ რამდენ კალორიას დაწვავთ, დამოკიდებულია იმაზე, თუ რა მანძილს ფარავთ და რამდენს იწონით. და არა სიარულისა თუ სირბილის ტემპზე. მიახლოებითი ცხრილი ასე გამოიყურება
თქვენი წონა (კგ) რამდენ კალორიას წვავთ 1.6 კმ-ის გავლისას
55 85
65 95
75 105
80 115
90 125
100 135
გადააქციეთ სეირნობა ყოველდღიურობის ნაწილად. იარეთ ფეხით მაღაზიაში ან სამსახურში. თუ სამსახური შორს არის, ჩამოდით ტრანსპორტიდან 2-3 გაჩერებით ადრე და დარჩენილი მანძილი ფეხით გაიარეთ. თუ ავტომობილით სარგებლობთ, დააპარკინგეთ ის ოფისიდან მოშორებით. ლიფტის ნაცვლად ისარგებლეთ კიბით.
ეს მცირე ცვლილებები, რომელსაც ყოველდღიურობაში შეიტანთ, დადებითად აისახება თქვენს ჯანმრთელობასა და სიცოცხლის ხანგრძლივობაზე.
